ભાજપનો નેતા અને ASI દારૂ સાથે ઝડપાયા: મોટા રાજકારણીઓ સાથે ઘરોબો, રાજસ્થાન બોર્ડર પર કારમાંથી 800થી વધુ બોટલ મળી – Ahmedabad News
ગુજરાતમાં દારૂબંધીના દાવાઓ ફરી એકવાર પોકળ સાબિત થયા હોવાનો જીવતો જાગતો પુરાવો મળ્યો છે. ભાજપના જ નેતા દારૂના મોટા જથ્થા સાથે પકડાયા છે. નવાઈની વાત એ પણ છે કે આ નેતા સાથે પોલીસકર્મચારીની પણ ધરપકડ કરવામાં આવી છે.
.
સાબરકાંઠા જિલ્લાના વિજયનગર તાલુકાના બિલડિયા ગામ પાસેથી પોલીસે જયેશ ભાવસાર નામના ભાજપના નેતાની દારૂ સાથે ધરપકડ કરી છે. જયેશ ભાવસારની ધરપકડ થઈ ત્યારે અમદાવાદ શહેરના શાહીબાગ હેડ ક્વાર્ટરમાં ફરજ બજાવતા આર્મ એ.એસ.આઇ. પ્રવીણકુમાર ધનજીભાઇ ચૌહાણ સાથે હતા. આ આરોપીઓને ચિઠોડા પોલીસે વિદેશી દારૂના જથ્થા તથા બિયરના જથ્થા સાથે ઝડપી લીધા છે.
જયેશ ભાવસાર ભૂતકાળમાં અસારવા વોર્ડના ભાજપના પ્રમુખ હતા. ત્યાર બાદ તેઓ ભાજપના પૂર્વ સાંસદ ડૉ.કિરીટ સોલંકીની ડિવિઝનલ રેલ યુઝર્સ કન્સલ્ટેટિવ કમિટીમાં (DRUCC ) તેમના નોમિની તરીકે ભલામણ કરવામાં આવી હતી અને તેમની નિમણૂક પણ થઇ હતી. આમ ભાજપના આગેવાનો સાથે ભાવસાર ઘરોબો ધરાવે છે.
પૂર્વ સાંસદ કિરીટ સોલંકી સાથે જયેશ ભાવસાર (ફાઇલ તસવીર)
ગુજરાતમાં દારૂની રેલમછેલ તેમજ ડ્રગ્સ પકડાવાના પણ અનેક બનાવો બની રહ્યા છે. નવાઇની વાત તો એ છે કે પોલીસ જ દારૂની હેરાફેરીમાં જોડાઇ ગઈ હોય એવું પ્રકાશમાં આવ્યું છે. થોડા સમય પૂર્વે જ ભચાઉમાં મહિલા પોલીસ કોન્સ્ટેબલ નીતા ચૌધરી બૂટલેગર સાથે ઝડપાઇ હતી. બાદમાં તે પોલીસને થાપ આપીને નાસી છૂટી હતી. જોકે તાજેતરમાં પોલીસે તેને ઝડપી લીધી છે. આ પ્રકરણ માંડ શાંત થયું ત્યાં વળી પોલીસ અને ભાજપના આગેવાન પણ દારૂની હેરાફેરી કરતા હોવાની હકીકતનો પર્દાફાશ થવા પામ્યો છે.
અમદાવાદ શહેરમાં પણ ખાસ કરીને અસારવા તેમજ મેઘાણીનગર સહિતના અનેક પૂર્વના વિસ્તારોમાંથી દારૂ ભૂતકાળમાં પણ ઘણીવાર પકડાયો છે. એનાથી પણ વિશેષ અમદાવાદ શહેરના મેઘાણીનગર વિસ્તારમાં જ અમદાવાદ શહેર પોલીસ કમિશનર જી.એસ. મલિક રહે છે. તેમનું ઘર મેઘાણીનગર પોલીસ મથકની હદમાં આવેલું છે. આ હદમાં દારૂનું જાહેર રોડ પર વેચાણ થતું હોવાની રજૂઆતના પગલે સ્ટેટ મોનિટરિંગ સેલ દ્વારા ખુદ અમદાવાદ શહેર પોલીસ કમિશનરને આ અંગે તપાસ કરીને કાર્યવાહી કરવા વિનંતી કરી છે.
ઉત્તરાયણ પર જયેશ ભાવસાર જ્યારે પતંગ ઉડાડતા હતા ત્યારે અસારવાના ધારાસભ્યએ ફિરકી પકડી હતી. (ફાઇલ તસવીર)
એટલું જ નહીં, બે દિવસમાં આ અંગેની કાર્યવાહીની જાણ કરવા તાકીદ કરવામાં આવી છે. આમ, મેઘાણીનગરનો વિવાદ હજુ શાંત થયો નથી કે એ બાબતે કોઇ દરોડાની કાર્યવાહી કરવામાં આવી હોવાનું હજુ જાહેર થયું નથી. ત્યાં વળી અસારવાના કલાપીનગર સ્થિત ગુજરાત હાઉસિંગ બોર્ડમાં રહેતા અને ભાજપના અસારવા વોર્ડના પૂર્વ પ્રમુખ અને હાલ અમદાવાદ શહેર ભાજપમાં નેતાગીરી કરતાં જયેશ ભાવસાર તથા અમદાવાદ શહેરના શાહીબાગ હેડ ક્વાર્ટરમાં આર્મ આસિસ્ટન્ટ સબ ઇન્સ્પેકટર તરીકે ફરજ બજાવતા પ્રવીણકુમાર ચૌહાણને 25મી જુલાઈએ 4 વાગ્યે વિદેશી દારૂના જથ્થા સાથે ઝડપી લેવામાં આવ્યા હતા.
સી.આર.પાટીલ અને હર્ષ સંઘવી સાથે જયેશ ભાવસાર (ફાઇલ તસવીર)
રાજસ્થાનથી એક XUV -500 ગાડીમાં ભારતીય બનાવટનો વિદેશી દારૂ ભરી ચિતરિયા થઇ અમદાવાદ બાજુ જવાની હોવાની અગાઉથી મળેલી બાતમીના આધારે સાબરકાંઠા જિલ્લાના વિજયનગર તાલુકાના ચિઠોડા પોલીસ સ્ટેશનના અનાર્મ હેડ કોન્સ્ટેબલ સંજયભાઇ રૂપાજી તથા હેડ કોન્સ્ટેબલ ગજેન્દ્રકુમાર કચરાજી તથા કોન્સ્ટેબલો રણજિતભાઇ, રણતેજભાઇ, નરેન્દ્રભાઇ બિલડિયા ગામે વોચ ગોઠવી હતી.
આ સમયગાળામાં દઢવાવ બાજુથી એક ગાડી આવતાં પોલીસે વચ્ચે આડાશ ઊભા કરી રોકી હતી. ગાડીની વચ્ચેની સીટના ભાગે તથા પાછળની સીટના ભાગે વિદેશી દારૂનાં બોક્સ મળ્યાં હતાં. નવાઇની વાત તો એ છે કે આ ગાડી અમદાવાદ શહેરના શાહીબાગ હેડ કવાર્ટરમાં આર્મ આસિસ્ટન્ટ સબ-ઇન્સ્પેકટર પ્રવીણકુમાર ચૌહાણ ચલાવતા હતા. તેની બાજુમાં જયેશ ભાવસાર બેઠા હતા.
પોલીસે આરોપીઓ પાસેથી વિદેશી દારૂ તથા બિયરની કુલ 893 બોટલ જપ્ત કરી છે, જેની કિંમત 1,96,490 થાય છે. વિદેશી દારૂની સાથે ગુનામાં વપરાયેલી 5 લાખની કિંમતની ગાડી તેમજ મોબાઇલ વગેરે મળીને કુલે 7,12,490નો મુદ્દામાલ કબજે કરવામાં આવ્યો છે.
ગત ફેબ્રુઆરીમાં અસારવા વિધાનસભા ઓમ નગર ખાતે યોજાયેલા એક કાર્યક્રમમાં અસારવાનાં ધારાસભ્ય દર્શનાબેન વાઘેલા, ઠક્કરબાપા નગરનાં ધારાસભ્ય કંચનબેન રાદડિયા, નરોડાનાં ધારાસભ્ય પાયલબેન કુકરાણી સાથે જયેશ ભાવસાર
આરોપીઓની પ્રાથમિક પૂછપરછમાં આ દારૂનો જથ્થો રાજસ્થાનના પહાડાથી ભરત નામના માણસે ભરીને આપ્યો હતો અને અમદાવાદના સરદારનગર સ્થિત ટાઉનશિપ સિટીમાં આવેલા ભગવતીનગરમાં રહેતા કિશોર કનૈયાલાલ વંજાનીને પહોંચાડવાના હતા. આમ, પોલીસે પ્રવીણકુમાર ધનજીભાઇ ચૌહાણ, જયેશ ભરતભાઇ ભાવસાર, પ્રહલાદ ઓમપ્રકાશભાઇ સોનગરા તેમજ કિશોર કનૈયાલાલ વંજાની અને ભરત સામે પ્રોહિબિશન એક્ટ હેઠળ ગુનો નોંધીને એ.એસ.આઇ. પ્રવીણ ચૌહાણ, ભાજપના કાર્યકર જયેશ ભાવસાર તેમ જ પ્રહલાદ સોનગરાની ધરપકડ કરીને કાયદેસરની કાર્યવાહી હાથ ધરી હતી.
રેલવેની મિટિંગમાં સામેલ થયેલા જયેશ ભાવસાર (ફાઇલ તસવીર)
પૂર્વ સાંસદની ભલામણથી જયેશ ભાવસારની કરાઈ નિમણૂક
અમદાવાદ પશ્ચિમ રેલવેના ડિવિઝનલ કોમર્શિયલ મેનેજર દ્વારા અમદાવાદ પશ્ચિમના પૂર્વ સાંસદ ડૉ.કિરીટ સોંલકીની ભલામણથી તેમના નોમિનેટેડ તરીકે અમદાવાદ ડિવિઝનના ડિવિઝનલ રેલ યુઝર્સ કન્સલ્ટેટિવ કમિટીમાં 1 જાન્યુઆરી 2022થી 31 ડિસેમ્બર 2023 સુધી નિમણૂક કરવામાં આવી હતી.
